مرة كان عندنا ضيف اسمه عمّ خالد، وكنت لسه متفرجة على حلقة من حلقات المحقق كونان، فاستخبيت ورا الكنبة وأول ما عم خالد قعد؛ رحت طالعة مرة واحدة وقايلاله بصوت عالي: وجدتك أيها القاتل!! لن تفلت من يدي ثانية!! سوف أذهب بك إلى السجن!!
أشك بنسبة تتجاوز الـ76% إن عمّ خالد وقتها قطع خلف، وأنا طبعًا اتضربت علقة محترمة، ولسببٍ ما .. عم خالد ما بقاش بيجيلنا تاني!
أنا شخصيًا بعتبر اللي حصل اليوم دا سوء حظ، أو سوء تفاهم، حاجة في الرينج دا ..
لذلك العلقة اللي أخدتها يوميها ما قللتش من هوسي بالكارتون وإني أحاول أقلد كل حاجة بشوفها
الغريب إني في طفولتي دايما كنت منبهرة بأصوات الإعلانات، وبالرغم من انبهاري بكل الاعلانات اللي بسمعها لكن عمري ما فكرت إني هبقى في يوم بعرف أعمل زيهم كده، كانت حاجة بعيدة عن خيالي تمامًا!
ممكن عشان لما كبرت بقيت شخصية عملية شوية، وشايفة إن ده لعب عيال ومستقبلي ومذاكرتي أهم من كل الكلام ده، وهو يعني الفرصة هتجيلي أنا تحديدًا من وسط الفنانين دول كلهم؟!!
من ضمن الحاجات اللي كنت بحب أسمعها: التعليق الصوتي في برنامج طحالب، الحقيقة كنت مبهورة بطريقة إلقائه، ومن كتر ما موهبته بتبهرني مكنتش مصدقة إن الأصوات دي كلها بيعملها شخص واحد!
لحد ما ظهرلي في مرة إعلان إن طحالب أكاديمي عاملة كورس في الإلقاء الصوتي، وسعر الكورس كان مناسب جدا، فقلت: وماله! أهو أتسلى بدل ما بقعد زهقانة طول الوقت!
بالفعل بدأت في الكورس.. ولقيته كورس قوي جدا من الجهة العلمية والعملية!
وخرّج فيا شخصية مكنتش أعرفها قبل كده، لأني بقيت دارسة أنواع الإلقاء واتعلمت ازاى أتحكم في طبقات صوتي وأدائي عشان يناسب كل نوع منهم.
الكورس كانت مدته شهر، وده من غير مبالغة كان أسعد شهر عدى عليا في حياتي!!
لحد ما اتخرجت من الكورس وكنت فاكرة إنه خلاص كدة مش هشوف الأكاديمي تاني لأن علاقتنا انتهت، دفعت فلوس أخدت كورس .. خلاص كده!
لكن اكتشفت إن طحالب أكاديمي مهتمين بينا وبتطويرنا وتدريبنا بعد الكورس ما خلص، زي اهتمامهم بينا أثناء الكورس بالظبط.
لما احتاجوا في شركة "أورانج" فويس أوفر لتسجيل خطوط الهوت لاين، وقدمت عيّنة راعيت فيها كل القواعد اللي اتدربت عليها في الكورس مع طحالب أكاديمي، وعجبهم مستوايا اللي اكتسبته مع التدريب المستمر أثناء الكورس وبعده، واتقبلت!!
وبالفعل سجلت مع أورانج، ودي كانت بداية شغل كتير في خطوط الـ"هوت لاين"
فسجلت بعدها لعشرات الشركات والمؤسسات والمطاعم اللي ليها فروع في مصر وسوريا وتركيا، وبقى ليا اسمي المعروف والمطلوب في مجال الفويس أوفر، وكل ده وصلته بسبب إني قررت أدفع مبلغ بسيط في كورس التعليق الصوتي مع طحالب أكاديمي، وكنت معتبرة نفسي داخلة أتسلى أصلًا!
علشان كده أنا هفضل طول عمري ممتنة للحظة اللي قدمت فيها في كورس طحالب أكاديمي، وممتنة للطريق اللي مشيت فيه في حياتي، وممتنة للمحقق كونان، وممتنة للعلقة اللي خدتها بسبب عم خالد.
